प्रतिनिधी : जुबेर शेख
धाराशिव : मागील दोन ते अडीच महिन्यांपासून धाराशिव आणि बार्शी परिसरात एका वाघाने मोठा धुमाकूळ घातला असून, या वाघाने अनेक शेतकऱ्यांच्या जनावरांवर हल्ला करून त्यांना ठार मारले आहे. या घटनांमुळे नागरिकांमध्ये भीतीचे वातावरण निर्माण झाले असून, शेतकरी मोठ्या संकटात सापडले आहेत. सततच्या हल्ल्यांमुळे शेतकऱ्यांचे मोठ्या प्रमाणावर आर्थिक नुकसान होत आहे, मात्र अजूनही वन विभागाला हा वाघ पकडण्यात यश आलेले नाही.
वन विभाग अपयशी; नागरिकांमध्ये रोष
गेल्या काही महिन्यांत या वाघाने शेकडो गायी, वासरे, शेळ्या आणि इतर पाळीव जनावरे ठार केले आहेत. या पार्श्वभूमीवर शेतकरी आणि स्थानिक नागरिकांनी वारंवार वन विभागाला वाघाला जेरबंद करण्याची मागणी केली. मात्र, अद्यापही वन विभागाला कोणतेही ठोस यश मिळालेले नाही. नागरिकांमध्ये भीती आणि रोष वाढत असून, वाघ नक्की कोणत्या भागात आहे, याबाबत प्रशासनाकडून कोणतीही अधिकृत माहिती मिळत नसल्याने संभ्रमाचे वातावरण आहे.
सामाजिक कार्यकर्त्यांचा आक्रमक पवित्रा
धाराशिव जिल्ह्यातील सामाजिक कार्यकर्ते मनोज जाधव यांनी या प्रकरणी आक्रमक भूमिका घेतली आहे. त्यांनी वारंवार प्रशासनाला आणि वन विभागाला निवेदने देऊन तातडीने वाघ पकडण्याची मागणी केली. मात्र, समाधानकारक प्रतिसाद न मिळाल्याने त्यांनी आंदोलनाचा इशारा दिला आहे. याआधी वन विभागाच्या निष्क्रियतेविरोधात विविध प्रकारची आंदोलने करण्यात आली आहेत.
गाढव भेट आंदोलनाची घोषणा
वन विभागाच्या अपयशाच्या निषेधार्थ सामाजिक कार्यकर्ते मनोज जाधव यांनी आता सरकार आणि वन विभागाच्या अधिकाऱ्यांविरोधात नवे आंदोलन उभे करण्याचा निर्णय घेतला आहे. २० मार्च रोजी महाराष्ट्र राज्याचे वनमंत्री यांना धाराशिव जिल्हाधिकारी कार्यालयामार्फत ‘गाढव भेट’ देऊन सरकारचा निषेध नोंदवला जाणार आहे. तसेच, या आंदोलनासाठी अधिकृत परवानगी मागण्यात आल्याचेही त्यांनी स्पष्ट केले आहे.
मंत्रालयापर्यंत पोहोचली आंदोलनाची बातमी
धाराशिवमध्ये सुरू असलेल्या या आंदोलनाची चर्चा आता थेट मंत्रालयापर्यंत पोहोचली आहे. या प्रकरणावर राज्याचे वनमंत्री आणि प्रशासन काय भूमिका घेते,वन विभागाच्या अधिकाऱ्यांवर कोणती कारवाई होते,आणि वाघाला पकडण्यासाठी कोणते ठोस उपाय केले जातात,याकडे संपूर्ण जिल्ह्याचे लक्ष लागले आहे.
0 टिप्पण्या