प्रतिनिधी : जुबेर शेख
धाराशिव : धाराशिवच्या सामाजिक वनीकरण विभागातील हजेरी नोंदवहीत भविष्यातील तारखांच्या सह्या आढळल्याची धक्कादायक बाब समोर आली आहे. शासकीय कार्यालयांमध्ये उपस्थिती नोंदी ही कामकाजातील पारदर्शकता आणि शिस्तीचा अत्यंत संवेदनशील भाग मानला जातो. मात्र या प्रकरणामुळे विभागीय कामकाजाच्या विश्वासार्हतेवर गंभीर प्रश्नचिन्ह निर्माण झाले आहे.
दैनंदिन हजेरी प्रत्यक्ष उपस्थितीवर आधारित असणे आवश्यक असल्याने भविष्यातील तारखांच्या सह्या आढळणे हे प्रशासनातील गंभीर त्रुटी सूचित करते. अशा प्रकारचे कृत्य महाराष्ट्र सिव्हिल सर्व्हिस (शिस्त व अपील) नियमांचे उल्लंघन तर आहेच, परंतु शासकीय दस्तऐवजाची चुकीची नोंद म्हणून हे भारतीय दंड संहितातील संबंधित कलमांनुसार दंडनीय ठरू शकते.
या घटनेमुळे सामान्य नागरिकांसह स्थानिक सामाजिक कार्यकर्त्यांमध्ये संतापाची भावना निर्माण झाली आहे. शासकीय विभागाकडून पारदर्शकता आणि शिस्तीची अपेक्षा केली जाते. अशा परिस्थितीत हजेरी नोंदीत फेरफार झाल्याची शंका नागरिकांनी व्यक्त केली असून, तातडीने उच्चस्तरीय चौकशी करून दोषी कर्मचाऱ्यांवर कठोर कारवाई करण्याची मागणी होत आहे.
तज्ञांच्या मते, भविष्यातील तारखांसाठी उपस्थिती नोंदणे हे फसवणूक, दस्तऐवजातील फेरफार आणि शासकीय कामकाजात अनियमितता म्हणून पाहिले जाते. अशा प्रकरणांत विभागीय चौकशी, निलंबन, तसेच अंतर्गत तपासणी अहवालानुसार गुन्हा नोंदवण्याचीही प्रक्रिया सुरू होऊ शकते.
या प्रकारामुळे सामाजिक वनीकरण विभागाच्या प्रतिमेला धक्का बसला असून, संपूर्ण शहरात या अनियमिततेची चर्चा सुरू आहे. शासकीय पारदर्शकता राखण्यासाठी अशा प्रकरणांमध्ये जलद आणि निष्पक्ष कारवाई करण्याची गरज असल्याचे तज्ज्ञांचे मत आहे.
0 टिप्पण्या