प्रतिनिधी: जुबेर शेख
धाराशिव : धाराशिव शहरातील कचरा डेपोचा प्रश्न दिवसेंदिवस गंभीर होत असतानाच यावरून आता राजकीय आरोप-प्रत्यारोपांनी जोर धरला आहे. या वादात आता ठाकरे गटाचे युवा सेना शहरप्रमुख रवी वाघमारे यांनी भाजप युवा मोर्चाच्या जिल्हाध्यक्षांवर थेट वैयक्तिक टीका केली आहे. "कचरा डेपोचा प्रश्न गंभीर आहेच, पण त्याआधी भाजप युवा मोर्चा जिल्हाध्यक्ष राजसिंह राजेनिंबाळकर यांच्या मेंदूची तपासणी करावी," असा जहरी टोला वाघमारे यांनी लगावला.
रवी वाघमारे म्हणाले की, “राजेनिंबाळकर यांनी 2021 मध्ये कचरा डेपो विरोधात आंदोलन केलं होतं. तेव्हा त्यांची मागणी डेपो हलवण्याची नव्हती, तरीही आता ते म्हणतात की त्यांच्या आंदोलनामुळे हा प्रश्न मार्गी लागला. ही गोष्ट हास्यास्पद आहे. स्वतःची पाठ थोपटून घेणं म्हणजे विचारशक्ती नसल्याचं स्पष्ट लक्षण आहे.”
यापुढे बोलताना वाघमारे म्हणाले की, "त्यावेळी भाजपचा उपनगराध्यक्ष असताना त्यांनी आपल्या पक्षाच्या विरोधात आंदोलन केलं. त्यानंतर नगरपालिकेवर प्रशासक आले, आणि काही महिन्यांत भाजप पुन्हा सत्तेत आली. तरीही या प्रश्नावर काहीच ठोस निर्णय झाला नाही. आता पालकमंत्री म्हणतात की एप्रिल अखेर हा प्रश्न मार्गी लावला जाईल, मग या आंदोलनाचं यश कोणाचं?"
वाघमारे यांनी भाजप युवा मोर्चाच्या भूमिकेवर उपरोधिक भाषेत टीका करताना म्हटलं, “या आंदोलनाने जर खरंच एवढं यश मिळालं असेल, तर त्यांनी आता धाराशिव जिल्ह्यातील ड्रग्ज प्रकरणावरही आंदोलन करावं. कदाचित त्यावरही सरकार लक्ष देईल.”
या टीकाटिप्पणीमुळे धाराशिवच्या राजकारणात पुन्हा एकदा खळबळ माजली असून कचरा डेपोप्रमाणेच हा वाद आता राजकीय 'डंपिंग ग्राउंड' बनू लागला आहे. यावर भाजप युवा मोर्चा काय प्रतिक्रिया देतो हे पाहणं औत्सुक्याचं ठरेल.
0 टिप्पण्या