"‘अलीम की अखिल की सलीम?’ – ट्रक ड्रायव्हरच्या गोंधळात लपलेला रेशन स्कॅम"..! धाराशिवकरांच्या आशा जिल्हाधिकाऱ्यांच्या निर्णयावर"

प्रतिनिधी : जुबेर शेख

धाराशिव – सध्या ओटीटी प्लॅटफॉर्मवर ‘हर्षद मेहता स्कॅम’, ‘तेलगी घोटाळा’ यांसारख्या वेब सीरिज प्रचंड लोकप्रिय झाल्या असल्या तरी धाराशिव जिल्ह्यातील पुरवठा विभागातील घोटाळा यांनाही मागे टाकणारा आहे. धान्य वितरणाच्या काळ्या बाजारात, कंत्राटदार व अधिकाऱ्यांच्या संगनमताने गोरगरीबांचे हक्काचे अन्नच काळ्या बाजारात विकले जात असल्याची धक्कादायक माहिती समोर आली आहे. जिल्ह्यात सुरू असलेल्या या महाघोटाळ्याची ‘वेब सीरिज’ सध्या मध्यंतराच्या टप्प्यावर आली असून, जिल्हाधिकारी ‘नायक’ ठरून कारवाई करतील की नाही, याकडे सगळ्यांचे लक्ष लागले आहे.

तांदूळ अफरातफर प्रकरण – आरोपी कोण?

१४ फेब्रुवारी रोजी तांदूळ वाहतूक करणाऱ्या ट्रकशी संबंधित प्रकरणात मोठी गोंधळाची स्थिती आहे. पोलिसांनी पकडलेला आरोपी ‘अखिल शेख’ आहे. मात्र गुन्हा दाखल ‘अलीम शेख’ याच्यावर आहे. शिवाय, ट्रान्सपोर्ट पासवर ‘सलीम शेख’ याचेही नाव दिसून येत आहे. पोलिसांनी अखिलच अलीम असल्याचा दावा केला असला तरी, मिळालेल्या माहितीनुसार १४ फेब्रुवारी रोजी ट्रक चालवणारा ‘अलीम शेख’ हा अल्पवयीन असून त्याचे वय समोर येऊ नये म्हणून एका बड्या व्यक्तीच्या खडी क्रेशरच्या वाहनावर चालक म्हणून अखिल शेख कामाला आहे अशी कुजबूज सुरू झाली असून नेमके सत्य काय आहे हे पोलीस तपासातून समोर येणार आहे. तसेच सलीम शेख हा अलीम शेखचा जवळचा नातलग असल्याचीही माहिती समोर येत आहे.

ढोकी पोलीस स्टेशनचे प्रभारी अधिकारी विलास हजारे यांनी मात्र आरोपी अल्पवयीन नसल्याचे सांगितले आहे. मात्र, पुरवठा विभाग व कंत्राटदाराने पोलिसांना गोंधळात टाकण्यासाठी पुरवणी जबाब देऊन खोटे आरोपपत्र तयार करण्याचा प्रयत्न केला आहे, अशी जोरदार चर्चा आहे. या प्रकरणातील सत्य पोलीस तपासातूनच स्पष्ट होणार आहे.

घोटाळा नेमका कसा घडतो?

या घोटाळ्याचे मूळ म्हणजे ‘वाहतूक आणि GPS’ व्यवस्थेतील फसवणूक. कंत्राटदाराने GPS नसलेल्या गाड्यांचा वापर केल्याचे बोलले जात आहे. GPS कंट्रोल रूममध्ये याची कोणतीही देखरेख होत नाही. त्यामुळे ही गाडी घेऊन अधिकाऱ्यांशी संगनमत करून अवैध वाहतूक केली जाते?. यासाठी खासगी गाड्या अत्यल्प दरात भाड्याने घेतल्या जातात, तर शासकीय कंत्राटामधील दराप्रमाणे भरपाई घेतली जाते. अशा प्रकारे लाखोंचा नफा कमावला जातो आणि याच माध्यमातून २०० कोटींपेक्षा अधिकचा घोटाळा झाल्याचा अंदाज आहे.

जिल्हाधिकाऱ्यांची भूमिका संशयास्पद?

या प्रकरणात माजी जिल्हाधिकारी डॉ. सचिन ओम्बासे यांनी गुन्हा दाखल करण्याचे आदेश दिले होते. मात्र त्यानंतर त्यांची बदली झाली. सध्याचे जिल्हाधिकारी कीर्ती किरण पुजार यांनी तरी देखील त्यांनी गोदामाची पाहणी केली काही बैठका देखील घेतल्या मात्र कारवाईचे पान त्यांनी अद्याप न हलवल्याने ते हिरो ठरतात की नाही याचा अंदाज कोणालाच लागत नाही मात्र त्यांची गुलदस्त्यातील भूमिका देखील उलटसुलट चर्चा घडवून आणत आहे.

घोटाळ्याची व्याप्ती वाढण्याची शक्यता

जिल्हा पुरवठा विभागात युनिट रजिस्टर मेंटेन नसल्याचीही माहिती समोर आली आहे.तसेच अनेक रेशन दुकाने नियमांचे पालन करत नाहीत. ही माहिती खरी ठरल्यास, हा घोटाळा हजार कोटींच्या वर जाऊ शकतो. यासंदर्भात ही जिल्हाधिकारी यांनी चौकशी करून या मागचे सत्य काय आहे हेही पहावे या चौकशीनंतरच याबाबतचा स्वतंत्र अहवाल बाहेर येण्याची शक्यता आहे.

तपासाचा पुढचा टप्पा – महत्त्वाचे मुद्दे:

आरोपींची खरी ओळख उघड करणे

सर्व सी.सी.टी.व्ही फुटेज तपासणे

संबंधित अधिकाऱ्यांचे कॉल डिटेल्स (CDR) तपासणे

ट्रान्सपोर्ट पासांची चौकशी

GPS प्रणालीबाबत पुरावे संकलन

धाराशिव जिल्ह्यातला हा महाघोटाळा म्हणजे गोरगरिबांच्या ताटातील अन्नावर डल्ला मारणाऱ्या भ्रष्ट यंत्रणेचा काळा अध्याय आहे?. जिल्हाधिकारी आणि पोलीस प्रशासन यांची कसोटी आता लागणार आहे. ही वेब सीरिज 'हॅपी एन्डिंग' ने संपणार की 'क्लिफहॅन्गर' वरच थांबणार, हे पाहणे औत्सुक्याचे ठरणार आहे.