प्रतिनिधी : अशोक गरड
औसा : औसा तालुक्यातील लेक्चर कॉलनी येथे एक धक्कादायक प्रकार घडला असून, जिजाऊ शाळेतील दोन विद्यार्थ्यांना भटकंती करत असलेल्या मोकाट कुत्र्याने चावा घेतल्याने ते गंभीर जखमी झाले आहेत. या घटनेमुळे पालकांमध्ये भीतीचे वातावरण निर्माण झाले असून, नगर परिषदेच्या भोंगळ कारभारावर पुन्हा एकदा प्रश्नचिन्ह निर्माण झाले आहे.
संबंधित परिसरात मोकाट कुत्र्यांचा उपद्रव वाढला असून, नागरिकांच्या वारंवार तक्रारी करूनही नगरपालिका प्रशासनाने अद्याप कोणतीही ठोस कारवाई केलेली नाही. परिणामी, आज दोन निरागस विद्यार्थ्यांना आपले बळी द्यावे लागले. जखमी विद्यार्थ्यांना तातडीने उपचारासाठी स्थानिक रुग्णालयात दाखल करण्यात आले असून, त्यांची स्थिर असल्याचे सांगण्यात येत आहे.
या प्रकारामुळे नागरिकांमध्ये तीव्र संताप व्यक्त होत असून, लेक्चर कॉलनीतील रहिवाशांनी यावर कठोर उपाययोजना करण्यात यावी अशी मागणी केली आहे. “ज्यावेळी कुत्र्यांचा त्रास वाढला होता, त्यावेळी वेळोवेळी नगरपरिषदेला लेखी तक्रारी करण्यात आल्या होत्या. मात्र कोणतीही दखल न घेतल्यामुळेच आज ही दुर्दैवी घटना घडली,” अशी प्रतिक्रिया एका स्थानिक नागरिकाने दिली.
पुढील काळात जर नगरपरिषदेने या समस्येकडे गांभीर्याने लक्ष दिले नाही, तर नागरिकांच्या वतीने तीव्र आंदोलन छेडण्यात येईल असा इशाराही देण्यात आला आहे.
स्थानिक सामाजिक कार्यकर्त्यांनी देखील या प्रकाराची निंदा केली असून, शहरातील इतर भागातही मोकाट कुत्र्यांच्या वाढत्या संख्येमुळे संकट निर्माण होत असल्याचे त्यांनी सांगितले.
नगरपरिषदेने या प्रकरणाची गंभीर दखल घेऊन तात्काळ मोकाट कुत्र्यांचा बंदोबस्त करावा, जखमी विद्यार्थ्यांना योग्य भरपाई द्यावी आणि अशा घटना पुन्हा होऊ नयेत यासाठी ठोस उपाययोजना कराव्यात, अशी मागणी नागरिकांतून होत आहे.
0 टिप्पण्या