राज्याचे माहिती तंत्रज्ञान व सांस्कृतिक कार्य मंत्री ॲड. आशिष शेलार यांचे श्री तुळजाभवानी देवीचे दर्शन व मंदिर विकास आढावा बैठक संपन्न

प्रतिनिधी : जुबेर शेख 

तुळजापूर - महाराष्ट्र राज्याचे माहिती तंत्रज्ञान व सांस्कृतिक कार्य मंत्री मा. ना. ॲड. श्री. आशिष शेलार यांनी आज सकाळी श्री. तुळजाभवानी देवीचे दर्शन घेऊन देवीच्या चरणी नतमस्तक होत महाराष्ट्राच्या विकासासाठी देवीचा आशिर्वाद मागितला. दर्शनानंतर त्यांनी श्री. तुळजाभवानी मंदिर परिसरात सुरू असलेल्या विकासकामांची पाहणी केली आणि यासंबंधी महत्त्वपूर्ण सूचना केल्या.

मंदिर संस्थानच्या प्रशासकीय कार्यालयात ॲड. आशिष शेलार यांच्या अध्यक्षतेखाली श्री तुळजाभवानी मंदिराच्या नव्या विकासकामांबाबत पुरातत्व विभागासोबत आढावा बैठक पार पडली. मंदिराच्या ऐतिहासिक व सांस्कृतिक वारशाला अनुकूल असे विकासकाम तातडीने आणि प्रभावीपणे पूर्ण व्हावे यासाठी या बैठकीत विविध बाबींचा आढावा घेण्यात आला. याआधीही गेल्या महिन्यात मंत्रालयात मंत्री श्री. शेलार यांच्या दालनात पुरातत्व विभागाच्या अधिकाऱ्यांसोबत यासंदर्भात बैठक झाली होती.

यावेळी ‘महाराष्ट्र इन्स्टिट्यूशन फॉर ट्रान्सफॉर्मेशन’ (मित्र) या संस्थेचे नवनियुक्त उपाध्यक्ष तथा विश्वस्त आमदार राणाजगजितसिंह पाटील यांनी श्री. तुळजाभवानी देवीची प्रतिमा, कवड्याची माळ व महावस्त्र प्रदान करून मा. मंत्री श्री. आशिष शेलार यांचा मंदिर संस्थानच्या वतीने सत्कार केला.

या बैठकीस तहसीलदार तथा व्यवस्थापक (प्रशासन) अरविंद बोळंगे, पुरातत्व विभागाचे संचालक डॉ. तेजस गर्गे, सहायक संचालक जया वहाणे, उपविभागीय पोलीस अधिकारी डॉ. नीलेश देशमुख, सहायक व्यवस्थापक (स्थापत्य) राजकुमार भोसले, सहायक व्यवस्थापक (धार्मिक) अनुप ढमाले, जनसंपर्क अधिकारी अनिरुद्ध देशपांडे, सहायक जनसंपर्क अधिकारी अभिजीत तेरखेडकर तसेच मंदिर संस्थानचे कर्मचारी उपस्थित होते.

श्री. शेलार यांनी मंदिराच्या विकासकामांबाबत प्रशासनास महत्त्वाच्या सूचना दिल्या आणि योजनेतील अडथळे दूर करून कामे गतीने पूर्ण करण्याच्या सूचना दिल्या.

या भेटीमुळे मंदिराच्या विकास प्रकल्पाला नवी दिशा मिळेल, अशी अपेक्षा व्यक्त होत आहे.