धाराशिवचे मनोज जाधव म्हणाले – ‘दादांना न्याय मिळेपर्यंत संघर्ष थांबणार नाही’

 

प्रतिनिधी : जुबेर शेख 

मुंबई : मराठा समाजाच्या आरक्षणासाठी गेल्या काही महिन्यांपासून लढा देणारे मराठा क्रांतीचे प्रतीक ठरलेले मराठा योद्धा मनोज जरांगे पाटील यांनी आज सकाळपासून मुंबईच्या आझाद मैदान येथे आपले आमरण उपोषण सुरू केले आहे. "जोपर्यंत मराठा समाजाला आरक्षण मिळत नाही तोपर्यंत माघार नाही" अशी ठाम भूमिका त्यांनी स्पष्ट केली असून त्यांच्या या हाकेला प्रतिसाद देण्यासाठी राज्यभरातून लाखो मराठा बांधव मुंबईत दाखल झाले आहेत. परिणामी संपूर्ण मुंबईत ठिकठिकाणी ट्रॅफिक जामची स्थिती निर्माण झाली आहे.

सरकारकडून या आंदोलनाला सुरुवातीला एका दिवसाची परवानगी देण्यात आली होती. मात्र, जमलेल्या गर्दीची दखल घेऊन आता ती आणखी एका दिवसासाठी वाढविण्यात आली आहे. दरम्यान, मिळालेल्या माहितीनुसार आज संध्याकाळी मंत्रिमंडळाची बैठक होणार असून त्यात मराठा समाजाच्या आरक्षणाबाबत काही ठोस निर्णय होण्याची शक्यता वर्तवली जात आहे. त्यामुळे संपूर्ण राज्याचे लक्ष या बैठकीकडे लागले आहे.

याच पार्श्वभूमीवर काही दिवसांपूर्वी ऑपरेशन झालेल्या धाराशिव जिल्ह्यातील मराठा बांधव मनोज जाधव यांच्याशी संपर्क साधला असता त्यांनी सरकारवर तीव्र शब्दांत टीका केली. जाधव म्हणाले, "प्रत्येक वेळी सरकार मराठ्यांना फसवत आले आहे. वेगवेगळी आश्वासने देऊन समाजाची दिशाभूल करण्यात आली आहे. मात्र, आता मनोज जरांगे पाटील यांनी घेतलेली 'आरक्षण मिळाल्याशिवाय माघार नाही' ही भूमिका ही मराठा समाजाच्या अस्तित्वाची लढाई आहे. या लढाईला लाखोंच्या संख्येने मराठा बांधवांनी दिलेला पाठिंबा हा अभूतपूर्व आहे. मला विश्वास आहे की यावेळी मराठा समाजाला नक्की न्याय मिळेल."

पुढे बोलताना त्यांनी सांगितले की, "मी शारीरिकदृष्ट्या मुंबईत हजर नसला तरी माझा संपूर्ण पाठिंबा दादांना आहे. मात्र सरकारने याकडे गांभीर्याने पाहिले नाही तर मी माझ्या तब्येतीची पर्वा न करता दादांना साथ देण्यासाठी मुंबईत दाखल होईल."

सध्या आझाद मैदानावर मराठा बांधवांचा उत्साह आणि जोश पाहायला मिळत असून वातावरण घोषणाबाजीने दुमदुमले आहे. "मराठा आरक्षण द्या", "जोपर्यंत आरक्षण नाही तोपर्यंत माघार नाही" अशा घोषणांनी संपूर्ण परिसर भरून गेला आहे.

सरकारच्या पुढील निर्णयावर या आंदोलनाचे भवितव्य ठरणार आहे. जर मंत्रिमंडळ बैठकीत ठोस निर्णय झाला नाही, तर हे आंदोलन राज्यात अधिक तीव्र होण्याची शक्यता आहे. त्यामुळे महाराष्ट्राचे राजकीय वातावरण आणखी तापण्याची चिन्हे दिसू लागली आहेत.