पहलगाममधील दहशतवादी हल्ल्याचा तुळजापूर मुस्लिम समाजाकडून तीव्र निषेध; एकात्मतेचा संदेश देत पंतप्रधानांना निवेदन

प्रतिनिधी : जुबेर शेख 

तुळजापूर: जम्मू-काश्मीरमधील पहलगाम येथे २२ एप्रिल रोजी झालेल्या भ्याड दहशतवादी हल्ल्याने संपूर्ण देश हादरला आहे. या हल्ल्यात २६ निष्पाप नागरिकांचा जीव गेला असून, अनेक जण गंभीर जखमी झाले आहेत. या पार्श्वभूमीवर तुळजापूर शहरातील मुस्लिम समाजाकडून या कृत्याचा तीव्र शब्दांत निषेध करण्यात आला असून, देशाच्या एकात्मतेसाठी ठामपणे उभे राहण्याचा संदेश देण्यात आला आहे.

तुळजापूर येथील मुस्लिम समाजाच्या विविध प्रतिनिधींनी एकत्र येत तहसील कार्यालयात मा. तहसीलदार यांच्या माध्यमातून पंतप्रधान नरेंद्र मोदी यांना निवेदन सादर केले. या निवेदनात त्यांनी नमूद केले की, “हा हल्ला केवळ काश्मीरमधील शांततेवरच नव्हे, तर अखंड भारताच्या एकतेवर करण्यात आलेला प्रयत्न आहे. अशा हल्ल्यांची संपूर्ण भारतीय जनता एकमुखाने निंदा करते आणि सरकारने या भ्याड कृत्याच्या जबाबदारांवर कठोरात कठोर कारवाई करावी.”

मुस्लिम समाजाच्या या प्रतिनिधींनी पुढे सांगितले की, देशातील नागरिकांमध्ये विश्वास निर्माण ठेवण्यासाठी आणि अशा घटना पुन्हा घडू नयेत यासाठी सरकारने अधिक कठोर पावले उचलावीत. हल्ल्यात बळी पडलेल्या कुटुंबीयांना योग्य न्याय व मदत मिळावी यासाठीही प्रयत्न होण्याची गरज त्यांनी अधोरेखित केली.

हा निषेध व्यक्त करण्यासाठी मौलाना मुफ्ती फिरदोस, हाफिज इब्राहिम पटवेकर, हाजी जावेद बागवान, फेरोज पठाण, अयाज पठाण, आरिफ शेख, रईस सिद्दीकी, शब्बीर पठाण, रफिक शेख, इमरान बागवान, हकीम शेख, अमीन नदाफ, शाहिद शेख, आरिफ बागवान, युसूफ शेख, सलीम सय्यद, समीर शेख, विखार सिद्दीकी, सिद्दीक पटेल यांच्यासह मुस्लिम समाजाचे शेकडो बांधव मोठ्या संख्येने उपस्थित होते.

या प्रसंगी एकात्मतेचा आणि शांततेचा संदेश देत संपूर्ण देशासोबत खंबीरपणे उभे राहण्याचा निर्धार करण्यात आला. "आमचा धर्म शांती, एकात्मता आणि मानवी मूल्यांवर आधारित आहे. अशा अतिरेक्यांच्या क्रूर कृत्यांना आमचा कोणताही पाठिंबा नाही आणि आम्ही सदैव देशाच्या सुरक्षेसाठी सरकारसोबत आहोत," असे प्रतिपादन अनेक उपस्थितांनी यावेळी केले.

तुळजापूरमधील मुस्लिम समाजाच्या या जबाबदारीपूर्ण आणि राष्ट्रीयतेने भारलेल्या भूमिकेचे सर्वत्र कौतुक होत आहे.