ग्रामपंचायतच्या निधी अपहाराविरोधात पराराम यादव यांचे अमरण उपोषण; महाराष्ट्र दिनी आंदोलनास सुरुवात

प्रतिनिधी : मुदस्सर शेख 

बीड : किल्ले धारूर तालुक्यातील धुनकवाड नं. 1 व 2 येथील ग्रामपंचायतीमध्ये तपासणीतून उघडकीस आलेल्या अपहाराच्या प्रकरणावर कारवाई न झाल्यास ग्रामस्थ पराराम यादव यांनी 1 मे 2025 रोजी ग्रामपंचायत कार्यालयासमोर अमरण उपोषणास बसण्याचा इशारा दिला आहे.

याबाबत मिळालेल्या माहितीनुसार, धुनकवाड नं. 1 व 2 गावात अस्तित्वात नसलेल्या वस्तीवर हायमास्ट पथदिवे बसविल्याचे दाखवून सुमारे 30 लाख रुपयांचा निधी अपहार करण्यात आल्याचा गंभीर आरोप पराराम यादव यांनी केला आहे. त्यांनी दिलेल्या निवेदनात सांगितले की, कागणे वस्ती, धनगर वस्ती व अहिल्याबाई होळकर वस्ती या ठिकाणी प्रत्येकी 10 लाख रुपयांचे पथदिवे बसविल्याचा दाखला ग्रामपंचायतीने दिला आहे. मात्र या वस्ती प्रत्यक्षात अस्तित्वात नसल्याचे माहिती अधिकारातून स्पष्ट झाले असून, ग्रामपंचायतीच्या नोंदीतही याचा कोणताही उल्लेख नाही.

याप्रकरणी पराराम यादव यांनी यापूर्वी अनेकवेळा तक्रारी करून सखोल चौकशीची मागणी केली होती. चौकशी समिती नेमण्यात आली असली तरी त्यांनी केलेली चौकशी ही केवळ औपचारिक असल्याचे आरोप यादव यांनी केले आहेत. याशिवाय मा. उपमुख्य कार्यकारी अधिकारी, जिल्हा परिषद बीड यांनीही यासंदर्भात गटविकास अधिकारी पं.स. धारूर यांना सखोल चौकशीचे आदेश दिले होते, परंतु अद्याप ठोस कारवाई झालेली नसल्याचे निदर्शनास आले आहे.

ग्रामसेवक व सरपंच यांनी संगनमत करून शासनाची दिशाभूल करत निधीचा गैरवापर केल्याचा आरोप करत, पराराम यादव यांनी संबंधितांवर फौजदारी गुन्हे दाखल करण्याची मागणी केली आहे. त्यांनी स्पष्ट केले आहे की, जर या प्रकरणात लवकरात लवकर योग्य ती कारवाई झाली नाही, तर ते महाराष्ट्र दिनी म्हणजेच 1 मे रोजी ग्रामपंचायत कार्यालयासमोर अमरण उपोषणास बसणार आहेत.

या प्रकरणावर प्रशासनाने गांभीर्याने लक्ष देणे अत्यंत आवश्यक असून, ग्रामपंचायतीतील पारदर्शकतेसाठी आणि निधी अपहारास प्रतिबंध घालण्यासाठी ठोस पावले उचलली जाणे गरजेचे आहे.