प्रतिनिधी : जुबेर शेख
धाराशिव – लाचलुचपत प्रतिबंधक विभाग, धाराशिव युनिटने आज एक यशस्वी सापळा कारवाई करून शासनाची कामे करण्यासाठी लाच मागणाऱ्या एका तलाठीसह खाजगी लिपीकाला रंगेहाथ पकडले आहे.
तक्रारीचा तपशील:
33 वर्षीय तक्रारदाराने आपल्या वडिलांच्या नावावरील शेत गट क्रमांक १५/१० मधील कुळाचे नाव कमी करण्यासाठी तहसिल कार्यालय, धाराशिव येथे अर्ज दाखल केला होता. सदर अर्जावर मंडळ अधिकारी तेर यांना स्थळ पाहणी करून पंचनामा व अहवाल तहसिलदारांना सादर करण्यास सांगण्यात आले होते. मात्र, या प्रक्रियेसाठी तलाठी भूषण वशिष्ठ चोबे व त्यांचे खाजगी लिपीक भारत शंकर मगर यांनी तक्रारदाराकडे 5000 रुपयांची लाच मागितली होती. तडजोडीनंतर 4000 रुपये देण्याचे ठरले.
पडताळणी व सापळा कारवाई:
तक्रार प्राप्त होताच लाचलुचपत प्रतिबंधक विभाग धाराशिव यांनी कारवाई रचली. आज दिनांक 5 मे 2025 रोजी तलाठी कार्यालय, वाघोली येथे सापळा रचण्यात आला. कारवाई दरम्यान आरोपी तलाठी भूषण चोबे यांनी खाजगी लिपीक भारत मगर यांच्यामार्फत तक्रारदाराकडून 4000 रुपयांची लाच स्वीकारली आणि त्याचवेळी त्यांना पंचासमक्ष रंगेहाथ अटक करण्यात आली.
आरोपींच्या अंगझडतीत मिळालेल्या वस्तू:
तलाठी भूषण चोबे यांच्या अंगझडतीत खालील वस्तू मिळून आल्या:
5 ग्रॅम वजनाची सोन्याची अंगठी
30 ग्रॅम वजनाचा चांदीचा कडा
सॅमसंग कंपनीचा मोबाईल
पार्कर कंपनीचे पेन
डेल कंपनीचा शासकीय लॅपटॉप
खाजगी लिपीक भारत मगर यांच्या अंगझडतीत:
लाच रक्कम 4000/- रुपये
इतर 1090/- रुपये रोख
सॅमसंग कंपनीचा साधा मोबाईल
तपासाची माहिती व पुढील कारवाई:
आरोपींच्या घरझडतीची प्रक्रिया सुरू असून, आरोपी क्रमांक 1 (तलाठी) विरोधात भ्र.प्र.क. अधिनियम कलम 12 नुसार, तर आरोपी क्रमांक 2 (खाजगी लिपीक) विरोधात कलम 7(a) नुसार धाराशिव ग्रामीण पोलीस ठाण्यात गुन्हा दाखल करण्याची प्रक्रिया सुरु आहे. दोघांनाही अटक करून पुढील तपासाची तयारी करण्यात आली आहे. आरोपींचे मोबाईल ताब्यात घेऊन त्याचा सखोल तपास केला जाणार आहे.
संपर्क अधिकारी व पथक:
सापळा अधिकारी: श्री. सिध्दाराम म्हेत्रे, पो.उप.अधीक्षक, लाप्रवि धाराशिव
मार्गदर्शक अधिकारी: श्री. संदीप आटोळे (पो.अधीक्षक, लाप्रवि छत्रपती संभाजीनगर), श्री. मुकुंद आघाव (अपर पो.अधीक्षक, लाप्रवि छ.संभाजीनगर)
सापळा पथक: पोलीस अंमलदार नेताजी अनपट, आशीष पाटील, नागेश शेरकर
तक्रार करण्यासाठी:
भ्रष्टाचारासंबंधी कोणतीही तक्रार असल्यास टोल फ्री क्रमांक 1064 वर किंवा पोलीस अधीक्षक (मो. 9923023361) तसेच पोलीस उप अधीक्षक (मो. 9594658686) यांच्याशी संपर्क साधावा.
0 टिप्पण्या