धाराशिव जिल्ह्याचे पालकमंत्री तथा परिवहन मंत्री मा.ना. प्रताप सरनाईक यांची एसटी महामंडळाच्या अध्यक्षपदी नियुक्ती

प्रतिनिधी : जुबेर शेख 

मुंबई : महाराष्ट्र राज्य मार्ग परिवहन महामंडळाच्या (एसटी महामंडळ) अध्यक्षपदी परिवहन मंत्री श्री. प्रताप सरनाईक यांची नियुक्ती करण्यात आली आहे. महाराष्ट्र शासनाच्या केंद्रीय अधिनियमान्वये तयार केलेल्या नियम व आदेशांनुसार ही नियुक्ती करण्यात आली आहे.

सन १९६० मध्ये स्थापन झालेल्या एसटी महामंडळाच्या पहिल्या अध्यक्षपदी श्री. र.गो. सरैय्या होते. त्यानंतर अनेक नामवंत व ख्यातनाम व्यक्तींनी या पदाची जबाबदारी सांभाळली आहे. आता श्री. प्रताप सरनाईक हे महामंडळाचे २६वे अध्यक्ष म्हणून कार्यभार स्वीकारणार आहेत.

नियुक्तीनंतर प्रतिक्रिया देताना प्रताप सरनाईक म्हणाले, "महाराष्ट्राच्या सर्वसामान्य जनतेची 'लोकवाहिनी' असलेल्या एसटीला आर्थिकदृष्ट्या सक्षम करून, दर्जेदार आणि विश्वासार्ह परिवहन सेवा उपलब्ध करून देण्याचा माझा प्रामाणिक प्रयत्न राहणार आहे. एसटीला नवसंजीवनी देऊन ही संस्था अधिक सक्षम, गतिमान आणि जनहितैषी बनवण्यासाठी मी कटिबद्ध आहे."

तसेच, या महत्त्वपूर्ण पदावर आपली नियुक्ती करून राज्याच्या जनतेची सेवा करण्याची संधी दिल्याबद्दल त्यांनी मुख्यमंत्री श्री. देवेंद्र फडणवीस, उपमुख्यमंत्री श्री. एकनाथ शिंदे आणि उपमुख्यमंत्री श्री. अजित पवार यांचे मनःपूर्वक आभार मानले.

श्री. सरनाईक यांच्या अध्यक्षतेखाली एसटी महामंडळ नव्या उमेदीने कार्यरत होईल, असा विश्वास वर्तवला जात आहे. राज्यातील कोट्यवधी प्रवाशांचे दैनंदिन जीवन सुलभ करणाऱ्या या महामंडळाची जबाबदारी सांभाळताना ते कोणते नविन निर्णय घेणार हे पाहणे औत्सुक्याचे ठरणार आहे.