तब्बल दोन महिन्यांनंतर वाघ पुन्हा सक्रिय;कोरेगावमध्ये गायवर हल्ला,वन विभाग सतर्क

प्रतिनिधी : जुबेर शेख 

धाराशिव:मागील पाच महिन्यांपासून धाराशिव व बार्शी तालुक्यात धुमाकूळ घालणाऱ्या वाघाने तब्बल दोन महिन्यांनंतर पुन्हा एकदा आपली सक्रियता दाखवली आहे. बार्शी तालुक्यातील कोरेगाव येथे वाघाचे दर्शन झाल्याचे वृत्त समोर आले आहे. विशेष म्हणजे, मागील दोन महिन्यांपासून या वाघाचा कुठलाही ठावठिकाणा लागत नव्हता, तसेच या काळात पाळीव प्राण्यांवर हल्लेही झाले नव्हते. त्यामुळे वाघाचा नेमका वावर कोठे आहे, याबाबत वन विभागासह स्थानिक जनतेत संभ्रमाचे वातावरण होते.

प्राथमिक माहितीनुसार, या काळात वाघाने जंगलातील रानडुक्कर व हरण यांसारख्या वन्य प्राण्यांवर शिकारी केली असल्याचे निदर्शनास आले आहे. त्यामुळे त्याचा वावर लपून राहिला होता. मात्र, पाच ते सहा दिवसांपूर्वी कोरेगाव येथे वाघाने एका गायीवर हल्ला केल्याची घटना घडली आहे. त्यामुळे सध्या वाघ बार्शी तालुक्यात असल्याचे स्पष्ट झाले आहे.

या घटनेनंतर वन विभागाने सतर्कतेचा इशारा दिला असून, येत्या काळात वाघाने पाळीव प्राण्यांवर पुन्हा हल्ला केल्यास त्याला पकडण्यासाठी विशेष पथक तातडीने कार्यरत केले जाणार असल्याचे सांगण्यात येत आहे. वाघाला जेरबंद करण्यासाठी जंगलात पिंजरे लावणे, ट्रॅकिंग यंत्रणा सक्रिय करणे व ड्रोनच्या मदतीने हालचालींवर लक्ष ठेवण्याचे उपाय अवलंबण्यात येणार आहेत.

दरम्यान, वाघाच्या हालचालीमुळे परिसरातील शेतकरी व ग्रामस्थांमध्ये भीतीचे वातावरण पसरले आहे. वाघ पकडण्यासाठी वन विभागाला कधी यश मिळते याकडे आता संपूर्ण जिल्ह्याचे लक्ष लागले आहे. ग्रामस्थांनी जंगलाजवळ किंवा एकट्याने फिरणे टाळावे, तसेच कोणतीही हालचाल आढळल्यास तातडीने वन विभागाशी संपर्क साधावा, असे आवाहनही प्रशासनाने केले आहे.