तांदूळ घोटाळ्याची चौकशी करण्यासाठी त्रिसदस्यीय समिती स्थापन

प्रतिनिधी : जुबेर शेख 

 

धाराशिव : धाराशिव जिल्ह्यातील सार्वजनिक वितरण व्यवस्थेतील ८.९४ क्विंटल तांदळाच्या अफरातफर प्रकरणाने राज्यात खळबळ उडवली आहे. सातत्यपूर्ण बातम्यांमुळे उघडकीस आलेल्या या प्रकरणात आता चौकशी समिती स्थापन करण्यात आली आहे. मात्र, या समितीला कालमर्यादा नसल्यामुळे ही चौकशी केवळ कारवाईसाठी की घोटाळेबाजांना वाचवण्यासाठी – हा प्रश्न जनतेच्या मनात निर्माण झाला आहे.

उपजिल्हाधिकारी भूसंपादन उदयसिंह भोसले यांच्या अध्यक्षतेखाली स्थापन झालेल्या त्रिसदस्यीय समितीत नायब तहसीलदार सचिन पाटील व लेखाधिकारी राहुल सलगर यांचा समावेश आहे. जिल्हाधिकारी कीर्ती किरण पुजार यांनी समितीला आदेश दिले असले तरी चौकशीसाठी कोणतीही निश्चित कालमर्यादा दिलेली नाही. यामुळे ही चौकशी किती दिवस चालणार आणि अहवाल कधी सादर होणार, हे स्पष्ट नाही.

चौकशीसाठी कालमर्यादा न देणे म्हणजेच प्रकरणाला वेळेच्या ओघात गिळंकृत करण्याचा प्रयत्न असल्याचा आरोप अनेक सामाजिक कार्यकर्ते करत आहेत. ८.९४ क्विंटल तांदूळ अफरातफर प्रकरणातून उगम पावलेल्या या घोटाळ्याचा व्याप २०० कोटींपेक्षा अधिक असून, काहींच्या मते याचा आकडा हजार कोटींपर्यंत जाऊ शकतो.

एम. एच. ४० एन ७५१३ या जीपीएसविना ट्रकबरोबरच, एम. एच. २१ एक्स २५८६ या दुसऱ्या ट्रकद्वारे देखील लातूरहून धाराशिव येथे धान्य आणले गेले होते. दोन्ही ट्रक जीपीएसशिवाय होते, यावर पुरवठा विभाग अद्याप मौन बाळगून आहे. ही गोष्टच पुरवठा यंत्रणेमधील सडलेपणा अधोरेखित करते.

या चौकशी समितीत निवृत्त न्यायाधीशांचा समावेश नाही, ही बाब देखील अनेकांच्या चिंतेचा विषय ठरत आहे. विशेषतः मुख्य आरोपी अल्पवयीन असल्याची शंका असल्यामुळे कायदेशीर बारकावे हाताळण्यासाठी न्यायिक दृष्टिकोन आवश्यक होता, अशी भावना व्यक्त होत आहे.

या प्रकरणाची चौकशी पारदर्शक व जलद होणे अत्यावश्यक आहे. अन्यथा, ही समिती देखील फक्त नावालाच कार्यरत असल्याचा शिक्का जनतेकडून बसण्याची शक्यता नाकारता येत नाही.