तांदूळ अफरातफर प्रकरण:आरोपीचे नाव अखिल, अलीम की सलीम? प्रशासन गोंधळात!"

प्रतिनिधी : जुबेर शेख 

धाराशिव - २०० कोटींच्या घोटाळ्यात अडकलेल्या पुरवठा विभागात आता नव्या गोंधळाने भर पडली आहे. ८.९४ क्विंटल तांदूळ अफरातफर प्रकरणातील आरोपीच्या नावावरूनच संभ्रम निर्माण झाला आहे. आरोपीचे नाव अखिल आहे की अलीम आहे की सलीम शेख आहे, हे अद्याप स्पष्ट झालेले नाही.

आरोपीच्या नावाचा गोंधळ

फूड कॉर्पोरेशनच्या स्लिपवर आरोपीचे नाव सलीम अलीम शेख असे आहे, तर ट्रान्सपोर्ट पासवर अलीम शेख, आणि पोलिस चौकशीत आरोपी स्वतःचे नाव अखिल शेख सांगत आहे. हा गोंधळ लक्षात घेता, पुरवठा विभागाने याबाबत सखोल चौकशी करावी, अशी मागणी पुढे येत आहे.

वाहतूक कंत्राटदाराने चालकाच्या ओळखीची शहानिशा केली होती का? त्याच्याकडे वाहन परवाना होता का? याची माहिती घेणे गरजेचे होते. जर आरोपीची खरी माहिती आणि कागदपत्रे व्यवस्थित असती, तर पुरवठा विभागाने ती जमा करून का घेतली नाहीत? पोलिस तपासाअभावी हा गोंधळ अधिक वाढला आहे. तसेच, कंत्राटदाराच्या संबंधांबाबतही संशय वाढत आहे. पुरवठा विभाग व कंत्राटदार यांच्यात काही संगनमत आहे का, हा प्रश्न उपस्थित होत आहे.

पुरवठा विभागाच्या अधिकाऱ्यांची भूमिका संशयास्पद

रेशन कार्ड हा राष्ट्रीयत्वाचा एक महत्त्वाचा पुरावा मानला जातो आणि तो पुरवठा विभागानेच प्रदान करावा लागतो. मात्र, आरोपीचे आधार कार्ड उपलब्ध नाही, आणि त्याच्या अंगठ्याचे ठसे घेऊनही आधार क्रमांक मिळू शकलेला नाही. त्यामुळे, आरोपीचे ओळखपत्र, त्याची खरी ओळख, तसेच यामागे पुरवठा विभागाच्या कोणत्या अधिकाऱ्याचा हात आहे, याचा शोध घेण्याची गरज आहे.

आधार कार्ड नसेल तर सही कोणाची?

यातील सर्वात महत्त्वाचा प्रश्न म्हणजे आरोपी सुशिक्षित आहे की अशिक्षित? ज्याचे आधार कार्ड नाही, तो शिकलेला असेल का? जर तो शिकलेला असेल, तर त्याने अलीम शेख या नावाने सही कशी केली? हा नवा प्रश्न निर्माण झाला आहे. त्याचे खरे नाव कोणते, आणि त्याची सही खरी आहे की बनावट, याचा तपास लागणे गरजेचे आहे.

या संपूर्ण प्रकरणात जिल्हा प्रशासनाने तातडीने चौकशी करून सत्य समोर आणणे गरजेचे आहे. अन्यथा, हा घोटाळा अधिकच गहिरा होण्याची शक्यता आहे.