"८.९४ क्विंटल तांदूळ घोटाळा: आरोपी सापडला, पण २०० कोटींच्या गैरव्यवहारावर पडदा का?"

प्रतिनिधी : जुबेर शेख 

धाराशिव - तेर येथे १४ फेब्रुवारी रोजी सरकारी तांदूळ खुल्या बाजारात विक्री करणाऱ्या आरोपीला दीड महिन्यानंतर पोलिसांनी अटक केली आहे. मात्र, या प्रकरणाने समोर आणलेल्या २०० कोटी रुपयांच्या घोटाळ्यावर अद्याप कोणतीही ठोस कारवाई झालेली नाही. प्रशासनाने या प्रकरणाकडे जाणीवपूर्वक दुर्लक्ष केल्याची चर्चा आहे.

घटनाक्रम उघड झाल्यानंतर सुरुवातीला प्रकरण दडपण्याचा प्रयत्न करण्यात आला. त्यानंतर हा घोटाळा लहान असल्याचे भासवले गेले. मात्र, जिल्हा प्रशासनाने निष्पक्ष चौकशीचा कोणताही प्रयत्न केला नाही. यामुळे उच्चपदस्थ अधिकाऱ्यांचा या घोटाळ्यात सहभाग असावा, अशी शंका बळावली गेली आहे.

धान्याच्या वाहतुकीसाठी शासनाने ठरवलेले नियम पुरवठा अधिकाऱ्यांकडून पूर्णपणे पायदळी तुडवले गेले. शासनाने बंधनकारक केलेली जी. पी. एस. प्रणाली नसलेल्या गाड्यांमध्ये सरकारी धान्याची वाहतूक करण्यात आली. या संदर्भात विचारले असता, अधिकाऱ्यांनी कोणतेही समाधानकारक उत्तर दिले नाही. अनेक महिने हा घोटाळा सुरू असल्याचे आरोप होत असूनही, पुरवठा विभागातील कोणत्याही अधिकाऱ्याची चौकशी करण्यात आलेली नाही. यामुळे हा घोटाळा दडपण्यासाठी मोठे प्रयत्न सुरू असल्याचे स्पष्ट होते.

या प्रकरणातील मुख्य आरोपी अलीम शेख याला ३० मार्च रोजी कर्जत येथे अटक करण्यात आली.३१ मार्च रोजी त्याला न्यायालयासमोर हजर करण्यात आले. पोलिसांनी चार दिवसांची कोठडी मागितली होती, मात्र केवळ एक दिवसाची पोलिस कोठडी मंजूर करण्यात आली. आरोपीचे खरे नाव अलीम शेख की अखिल शेख? तसेच, तो नळदुर्गचा रहिवासी आहे की धाराशिवचा? आणि तक्रार करताना पुरवठा विभागाने दिलेली माहिती खरी होती की खोटी? या सर्व बाबींचा तपास सुरू आहे.

सरकारी धान्य वितरणासाठी सरकार कोट्यवधी रुपये खर्च करते. परंतु, पुरवठा विभागाने या जबाबदारीत मोठी हयगय केल्याचे उघड झाले आहे. वाहतूक व्यवस्थेतील जी. पी. एस. प्रणाली दुर्लक्षित करून अधिकाऱ्यांनी हा घोटाळा केला असल्याचे नागरिकांकडून दबक्या आवाजात बोलले जात आहे, योजनेची संपूर्ण पारदर्शकता समोर यावी यासाठी श्वेतपत्रिका काढण्याची मागणी केली जात आहे. यामुळे गरीबांना त्यांचे हक्काचे धान्य मिळाले की नाही, हे स्पष्ट होईल.