हिंगोलीला नवे जिल्हाधिकारी मिळाले : राहुल गुप्ता यांची नियुक्ती, राज्यभरातून अभिनंदनाचा वर्षाव

प्रतिनिधी : जुबेर शेख 

 

हिंगोली : राज्य सरकारने आयएएस अधिकाऱ्यांच्या बदल्यांच्या सत्रात आणखी एक महत्त्वपूर्ण निर्णय घेतला असून, हिंगोली जिल्ह्याच्या नवे जिल्हाधिकारी म्हणून २०१७ बॅचचे आयएएस अधिकारी राहुल गुप्ता यांची नियुक्ती करण्यात आली आहे. छत्रपती संभाजीनगर येथे महाराष्ट्र राज्य वीज वितरण कंपनी लिमिटेड (एमएसईडीसीएल)चे व्यवस्थापकीय संचालक म्हणून कार्यरत असलेले गुप्ता हे यापूर्वी धाराशिव जिल्हा परिषदेचे मुख्य कार्यकारी अधिकारी म्हणून काम पाहत होते. त्यांच्या बदल्याचे आदेश मंगळवारी (दि. १५ एप्रिल) अपर मुख्य सचिव (सेवा) व्ही. राधा यांनी जारी केले.

हिंगोली जिल्हाधिकारी पदावर आधी कार्यरत असलेले अभिनव गोयल यांची काही दिवसांपूर्वीच बदली झाली होती. त्यांची कल्याण-डोंबिवली महानगर पालिका आयुक्तपदी नियुक्ती करण्यात आली आहे. त्यामुळे हिंगोली जिल्ह्यातील नागरिक आणि प्रशासनामध्ये नव्या जिल्हाधिकाऱ्याच्या नावाबाबत उत्सुकता होती. अखेर त्या प्रतीक्षेला पूर्णविराम मिळत राहुल गुप्ता यांची हिंगोली जिल्हाधिकारी म्हणून नियुक्ती झाल्याचे स्पष्ट झाले.

राहुल गुप्ता हे आयआयटी रोपार, पंजाब येथून इलेक्ट्रिकल इंजिनिअरिंगची पदवीधारक असून, त्यांच्या कार्यशैलीसाठी ते ओळखले जातात. त्यांनी गडचिरोली येथे सहाय्यक जिल्हाधिकारी, धाराशिव जिल्हा परिषदचे मुख्य कार्यकारी अधिकारी आणि एमएसईडीसीएलचे संचालक अशा विविध पदांवर जबाबदारी सांभाळली आहे.

धाराशिव जिल्ह्यात सीईओ म्हणून कार्यरत असताना त्यांनी जलसंधारण, शालेय शिक्षण, महिला सबलीकरण, अपंगांसाठी सुविधा यासारख्या क्षेत्रात अनेक नाविन्यपूर्ण उपक्रम राबवले होते. त्यांच्या या कार्याची राज्यपातळीवर दखल घेण्यात आली होती.

हिंगोली जिल्ह्यासारख्या ग्रामीण आणि विकासाच्या दृष्टीने महत्त्वाच्या जिल्ह्यात जिल्हाधिकारी पदावर राहुल गुप्ता यांची नियुक्ती होणे, ही जिल्ह्याच्या विकासासाठी एक सकारात्मक पाऊल ठरणार आहे, अशी अपेक्षा व्यक्त केली जात आहे. त्यांच्या नियुक्तीबद्दल राज्यभरातून शासकीय आणि सामाजिक क्षेत्रातील मान्यवरांकडून अभिनंदनाचा वर्षाव होत आहे.

गुप्ता लवकरच हिंगोली येथे कार्यभार स्वीकारणार असून, जिल्ह्यातील विविध प्रशासकीय विषय हाताळताना त्यांच्या अनुभवाचा मोठा फायदा होईल, असा विश्वास व्यक्त केला जात आहे.