प्रतिनिधी : अशोक गरड
औसा:भारतीय संविधानाचे शिल्पकार आणि समाजसुधारक भारतरत्न डॉ. बाबासाहेब आंबेडकर यांची 134 वी जयंती आज मासुर्डी गावात मोठ्या उत्साहात आणि अभिमानाने साजरी करण्यात आली.
आज सकाळी गावातील बस स्टँडजवळ असलेल्या बाबासाहेबांच्या पुतळ्याला पुष्पहार अर्पण करून आणि त्यांच्या कार्याची आठवण काढून कार्यक्रमाची सुरुवात झाली. या कार्यक्रमासाठी गावातील नागरिक मोठ्या संख्येने उपस्थित होते.
या प्रसंगी मासुर्डी गावाचे सरपंच भाऊसाहेब पाटील, संभाजी सेनेचे तालुकाध्यक्ष मनोज गरड, सहकारी सोसायटीचे चेअरमन उमेश पिंपरी, तसेच दयानंद यादव, गजानन यादव, संतोष यादव आणि मीटू गरड यांनी बाबासाहेबांना अभिवादन केले व त्यांच्या सामाजिक, शैक्षणिक आणि राजकीय योगदानाचे स्मरण केले.
यावेळी बोलताना सरपंच भाऊसाहेब पाटील म्हणाले, "डॉ. बाबासाहेब आंबेडकर यांनी दिलेले संविधान हे आपल्या देशाच्या विकासाचा मूलाधार आहे. त्यांनी समाजातील शेवटच्या घटकासाठी काम करून समतेचा संदेश दिला."
कार्यक्रमात विविध सामाजिक व सांस्कृतिक उपक्रम राबवण्यात आले. गावातील तरुणांनी बाबासाहेबांच्या विचारांची प्रदर्शने मांडली, तर काहींनी त्यांच्या जीवनकार्यावर आधारित भाषणे दिली.
कार्यक्रमाच्या यशस्वी आयोजनासाठी ग्रामपंचायत, स्थानिक संघटना व ग्रामस्थांनी परिश्रम घेतले. संपूर्ण मासुर्डी गावात आजचा दिवस राष्ट्रपुरुषाच्या स्मृतीने भारावलेला होता.
0 टिप्पण्या