हातलादेवी परिसरात हल्ला: वाघ-बिबट्याच्या वाढत्या वावरामुळे नागरिकांमध्ये भीतीचे वातावरण

प्रतिनिधी : जुबेर शेख 

धाराशिव : धाराशिव शहरापासून काही अंतरावर असलेल्या हातलादेवी परिसरात एका म्हशीच्या पिल्ल्यावर वाघाने किंवा बिबट्याने हल्ला केल्याची घटना घडली आहे. ही घटना मध्यरात्री घडूनही, दुपारच्या चार वाजेपर्यंत वनविभागाचे अधिकारी घटनास्थळी न पोहोचल्याने नागरिकांमध्ये तीव्र नाराजी व्यक्त केली जात आहे.

सामाजिक कार्यकर्ते मनोज जाधव यांनी त्वरित घटनास्थळी जाऊन परिस्थितीचा आढावा घेतला आणि शेतकऱ्यांची भेट घेतली. शेतकऱ्यांनी सांगितले की, मागील दीड महिन्यांपासून या भागात वाघ किंवा बिबट्याचा वावर वाढला असूनही प्रशासन याकडे गांभीर्याने लक्ष देत नाही. परिसरात लहान मुलांची शाळा आणि नागरी वस्ती असल्याने हा प्रकार अतिशय धोकादायक ठरत आहे.

यावर संताप व्यक्त करत मनोज जाधव यांनी वन विभागाच्या दिरंगाईवर जोरदार टीका केली. "नागरिकांच्या सुरक्षेचा प्रश्न गंभीर असताना प्रशासन मात्र गाढ झोपेत आहे. सततच्या आंदोलने आणि तक्रारींनंतरही उपाययोजना का होत नाहीत?" असा सवाल त्यांनी उपस्थित केला.

या घटनेनंतर नागरिकांमध्ये भीतीचे वातावरण असून वनविभागाने तातडीने ठोस पावले उचलावीत, अशी मागणी होत आहे. प्रशासनाने त्वरित उपाययोजना न केल्यास अधिक तीव्र आंदोलन छेडण्याचा इशाराही देण्यात आला आहे.