प्रतिनिधी : जुबेर शेख
तुळजापूर : तुळजापूर शहरालगत बार्शी रोड येथे घडलेल्या खून प्रकरणाचा गुन्हा स्थानिक गुन्हे शाखेने केवळ 24 तासांत उघडकीस आणत दोघा संशयित आरोपींना अटक केली आहे. या कामगिरीमुळे पोलिसांच्या जलद आणि प्रभावी तपासाचे कौतुक होत आहे.
दिनांक 5 मार्च 2025 रोजी बार्शी रोड येथे सत्तार यासीन इनामदार (रा. सिंदफळ) यांचा अज्ञात व्यक्तीने लोखंडी रॉडने डोक्यात मारून निर्घृण खून केल्याची माहिती पोलिसांना मिळाली. घटनेचे गांभीर्य ओळखून तुळजापूर पोलीस आणि स्थानिक गुन्हे शाखेच्या पथकाने तत्काळ तपास सुरू केला.
जलदगती तपास आणि आरोपींची अटक
तपासादरम्यान मिळालेल्या गोपनीय माहितीनुसार, या गुन्ह्यात मुख्य संशयित समाधान संपत शिंदे (रा. धारूर) याने सहभाग घेतल्याचे स्पष्ट झाले. तो कोल्हापूर जिल्ह्यातील कागल येथे असल्याची विश्वसनीय माहिती पोलिसांना मिळाली. त्यामुळे स्थानिक गुन्हे शाखेच्या विशेष पथकाने त्वरित कागल गाठून त्याला ताब्यात घेतले.चौकशीदरम्यान समाधान शिंदे याने गुन्ह्याची कबुली दिली.
तसेच, या गुन्ह्यातील दुसरा आरोपी गणेश घाटशिळे (रा. सिंदफळ) हा तुळजापूर परिसरात असल्याची माहिती मिळाली. त्यामुळे स्थानिक गुन्हे शाखेच्या आणखी एका टीमने तुळजापूर येथे कारवाई करत त्यालाही ताब्यात घेतले. अशा प्रकारे अवघ्या 24 तासांत खून प्रकरणाचा छडा लावत दोन्ही आरोपींना अटक करण्यात पोलिसांना यश आले.
पोलीस यंत्रणेची उल्लेखनीय कामगिरी
या अत्यंत संवेदनशील खून प्रकरणाच्या तपासासाठी पोलीस अधीक्षक संजय जाधव, अपर पोलीस अधीक्षक गौहर हसन, तसेच उपविभागीय पोलीस अधिकारी निलेश देशमुख यांच्या मार्गदर्शनाखाली तपास करण्यात आला.
सदर तपासाची जबाबदारी स्थानिक गुन्हे शाखेचे पोलीस निरीक्षक विनोद इज्जपवार यांच्या नेतृत्वाखालील पथकाने पार पाडली. या पथकात सहायक पोलीस निरीक्षक सुदर्शन कासार, सचिन खटके, सपोफौ वली उल्ला काझी, पोलीस हवालदार विनोद जानराव, शौकत पठाण, प्रकाश औताडे, जावेद काझी, दयानंद गादेकर, पोलीस नाईक नितीन जाधवर, बबन जाधवर, पोलीस अंमलदार योगेश कोळी, अशोक कदम, सुनील मोरे (TAW), तसेच चालक मेहबूब अरब, रत्नदिप डोंगरे, नितीन भोसले आदींचा समावेश होता.
स्थानिक गुन्हे शाखेच्या जलद कारवाईमुळे अवघ्या 24 तासांत आरोपींना अटक करत खून प्रकरण उघडकीस आणण्यात यश आले आहे. या कामगिरीबद्दल पोलिसांचे सर्व स्तरातून कौतुक होत आहे.
0 टिप्पण्या