आंबेगावचा सुपुत्र तथा वीर महाराष्ट्र न्यूजचे प्रतिनिधी मिलिंद रमेश भांगरे यांचा शौर्यपूर्ण कार्याबद्दल घोडेगाव ग्रामपंचायतीतर्फे गौरव

 

प्रतिनिधी : मिलिंद भांगरे

पुणे : आंबेगाव तालुक्यातील आंबेगाव गावठाण येथील सुपुत्र, आपदा मित्र तसेच वीर महाराष्ट्र न्यूजचे प्रतिनिधी आणि आंबेगाव तालुका मराठी पत्रकार संघाचे सक्रिय सदस्य मिलिंद रमेश भांगरे यांना त्यांच्या साहसी, शौर्यपूर्ण आणि निस्वार्थी कार्याबद्दल घोडेगाव ग्रामपंचायत यांच्या वतीने सन्मानचिन्ह देऊन गौरविण्यात आले.

घोडेगाव (ता. आंबेगाव) येथील गणेशोत्सव विसर्जन मिरवणुकीच्या पार्श्वभूमीवर ग्रामपंचायत कार्यालयाच्या वतीने विविध क्षेत्रात उल्लेखनीय कार्य करणाऱ्या व्यक्तींचा सत्कार समारंभ आयोजित करण्यात आला होता. यावेळी आपदा मित्र मिलिंद भांगरे यांचा विशेष सत्कार करण्यात आला.

20 ऑगस्ट 2025 रोजी घोड नदीचा महापूर

या कार्यक्रमात सांगण्यात आले की, दिनांक 20 ऑगस्ट 2025 रोजी घोड नदीला आलेल्या महापुराच्या वेळी मिलिंद भांगरे यांनी स्वतःचा जीव धोक्यात घालून तीन आदिवासी कातकरी समाजातील नागरिकांचे प्राण वाचवले होते. धोकादायक परिस्थितीत देखील त्यांनी दाखवलेले धैर्य आणि तत्परता कौतुकास्पद असल्याचे ग्रामपंचायत पदाधिकाऱ्यांनी गौरवले.

या प्रसंगी आंबेगाव तालुका विद्या विकास मंडळाचे उपाध्यक्ष अॅड. संजय आर्विकर यांच्या हस्ते शाल, श्रीफळ आणि सन्मानचिन्ह देऊन भांगरे यांचा सत्कार करण्यात आला.

सत्कारानंतर बोलताना मिलिंद भांगरे म्हणाले की, “त्या दिवशी मी माझा जीव धोक्यात घालून तरुणांना सुरक्षित बाहेर काढले. भविष्यात असा कुठलाही प्रसंग आला तर मी समाजासाठी नेहमी पुढे असेल.”

या सत्कार समारंभामुळे ग्रामपंचायत परिसरात उत्साहाचे वातावरण होते. समाजासाठी निस्वार्थीपणे कार्य करणाऱ्या तरुणांचा गौरव करण्यात येत असल्याने उपस्थितांनी समाधान व्यक्त केले.