ईद-ए-मिलादनिमित्त पुण्यात आनंदवन येथे वृक्षारोपणाचा हरित संकल्प

 

प्रतिनिधी : प्रविण मोरे

पुणे : पुण्यातील आनंदवन येथे ईद-ए-मिलादुन्नबी (पैगंबर मुहम्मद यांच्या जन्मदिन) निमित्ताने वृक्षारोपण कार्यक्रमाचे आयोजन करण्यात आले. पैगंबर मुहम्मद यांच्या शिकवणीत निसर्गसंवर्धन, करुणा व मानवतेचा संदेश अधोरेखित केला गेला असून त्याच धर्तीवर या विशेष दिवशी हिरवाईचा संकल्प करण्यात आला.

या उपक्रमात मदरशातील विद्यार्थ्यांनी उत्साहाने सहभाग नोंदवला. झाडे लावून त्यांनी पर्यावरण रक्षणाचा संदेश दिला. विद्यार्थ्यांचे योगदान व उपस्थितीबद्दल आयोजकांनी विशेष आभार मानले.

कार्यक्रमात बोलताना मान्यवरांनी सांगितले की पैगंबर मुहम्मद यांनी मानवतेसाठी दिलेल्या संदेशांपैकी एक महत्त्वाचा संदेश म्हणजे "जो कोणी झाड लावतो आणि त्या झाडाचा उपयोग कोणत्याही प्राणी किंवा मानवाला होतो, ते मानवतेचे आशीर्वाद आणि कल्याण आहे." हाच संदेश लक्षात घेऊन वृक्षारोपणाला विशेष महत्त्व दिले गेले.

स्थानिक समाजातील नागरिकांनीदेखील या उपक्रमाचे स्वागत केले. झाडे लावणे, त्यांचे संगोपन करणे ही आजच्या काळाची गरज असल्याचे मत व्यक्त करण्यात आले. आगामी पिढ्यांना शुद्ध हवा व चांगले पर्यावरण मिळावे यासाठी प्रत्येकाने आपली जबाबदारी ओळखली पाहिजे, असे आवाहन यावेळी करण्यात आले.

ईद-ए-मिलादच्या या विशेष उपक्रमामुळे पुण्यातील आनंदवन परिसर हरिताईकडे वाटचाल करीत आहे. हा उपक्रम सामाजिक बांधिलकी व धार्मिक मूल्यांची सांगड घालणारा ठरला आहे.