चिंचोली ते बोरफळ दरम्यान महानगर गॅसच्या पाईपलाईनचे काम थांबवण्याची मागणी; शेतकऱ्यांमध्ये तीव्र असंतोष

प्रतिनिधी : अशोक गरड 

लातूर: चिंचोली येथून बोरफळ पर्यंत सुरू असलेल्या महानगर गॅसच्या १६ किलोमीटरच्या पाईपलाईनच्या कामावर शेतकऱ्यांनी तीव्र नाराजी व्यक्त केली असून, सदरील काम तात्काळ थांबवण्याची मागणी जिल्हाधिकारी कार्यालयाकडे करण्यात आली आहे. यासंदर्भात श्री. राज योगीराज पाटील यांच्या नेतृत्वाखाली एक निवेदन जिल्हाधिकाऱ्यांना सादर करण्यात आले.

या निवेदनात नमूद केल्याप्रमाणे, पाईपलाईनच्या कामामुळे राष्ट्रीय महामार्ग क्र. ३६१ लगत लावण्यात आलेल्या तब्बल ४७०० झाडांची तोड करण्यात आली आहे. तसेच, शेतकऱ्यांच्या शेतातील फळझाडे व रोहित्र (डीपी) यांचेही मोठ्या प्रमाणात नुकसान झाले आहे.

शेतकऱ्यांचा आरोप आहे की, खोदकामातून बाहेर पडणारे दगड व मुरूम हे गुत्तेदारांकडून परस्पर नेले जात असून, याकडे प्रशासन दुर्लक्ष करत आहे. याशिवाय, पाईपलाईन टाकण्याच्या कामात नियमांचे उल्लंघन होत असून, पाईपच्या वरखाली काळ्या मातीचा थर न घालता थेट पाईप बसवली जात आहे.

यामुळे भविष्यात दुर्घटनांचा धोका निर्माण होण्याची शक्यता वर्तवली जात आहे. याशिवाय, सदर परिसरातील शेतकऱ्यांनी अद्याप त्यांच्या शेतजमिनीच्या अधिग्रहणाच्या मोबदल्यासंदर्भात याचिका दाखल केलेली असूनही, त्या याचिकेची कोणतीही दखल न घेता पाईपलाईनचे काम सुरू ठेवले जात असल्याची तक्रार करण्यात आली आहे.

या पार्श्वभूमीवर, शेतकऱ्यांमध्ये तीव्र असंतोष निर्माण झाला असून, सदर काम तात्काळ थांबवण्याची आणि दोषींवर कठोर कारवाई करण्याची मागणी करण्यात आली आहे. अन्यथा, शेतकरी आक्रमक आंदोलन करतील आणि त्याची संपूर्ण जबाबदारी महानगर गॅस कंपनी, राष्ट्रीय महामार्ग प्राधिकरण आणि प्रशासनावर असेल, असा इशारा निवेदनात देण्यात आला आहे.