महिला बचत गट उत्पादने स्वस्त धान्य दुकानाचे दारी या अभियानाचे जिल्हाधिकारी यांच्या हस्ते भव्य शुभारंभ

प्रतिनिधी : जुबेर शेख 

धाराशिव : महिला बचत गटांच्या उत्पादनांना बाजारपेठ मिळावी आणि स्थानिक स्तरावर महिलांच्या आर्थिक सक्षमीकरणाला चालना मिळावी, या उद्देशाने सुरू करण्यात आलेल्या "महिला बचत गट उत्पादने स्वस्त धान्य दुकानाचे दारी" या अभिनव उपक्रमाचा शुभारंभ धाराशिव जिल्ह्याचे जिल्हाधिकारी मा. श्री. किर्ती किरण पुजार यांच्या हस्ते संपन्न झाला.

उद्घाटन समारंभ श्री नागेश जगदाळे यांच्या स्वस्त धान्य दुकान क्रमांक 17 येथे मोठ्या उत्साहात पार पडला. यावेळी जिल्हाधिकारी मा. श्री. किर्ती किरण पुजार यांनी महिला बचत गटांच्या प्रयत्नांचे कौतुक करत सांगितले की, "या उपक्रमामुळे महिला बचत गटांच्या उत्पादने आता थेट सर्वसामान्य जनतेपर्यंत पोहोचणार आहेत. हे एक स्वागतार्ह पाऊल असून यामुळे ग्रामीण भागातील महिलांना नवी दिशा मिळेल."

कार्यक्रमात विविध महिला बचत गटांच्या सदस्यांनी आपल्या उत्पादनांचे प्रदर्शन केले. या उपक्रमांतर्गत ग्राहकांना स्वस्त दरात दर्जेदार उत्पादने उपलब्ध होणार आहेत.

या वेळी जिल्हा पुरवठा अधिकारी शेंडे मॅडम,अनेक मान्यवर, स्थानिक नागरिक व बचत गटांच्या सदस्यांची मोठ्या संख्येने उपस्थिती होती.जिल्हा प्रशासनाच्या या उपक्रमामुळे महिलांच्या अर्थिक स्वावलंबनाला नवी दिशा मिळेल, असा विश्वास व्यक्त केला जात आहे.