तुळजापूर हादरला :भटकी शाळेजवळ अर्भकाचा मृतदेह सापडल्याने खळबळ

 

प्रतिनिधी : जुबेर शेख 

तुळजापूर : तुळजापूर शहरात शनिवारी दुपारी उघडकीस आलेल्या एका हृदयद्रावक घटनेमुळे शहर हादरून गेले आहे. नळदुर्ग रोडवरील मंठाळकर मंगल कार्यालयाजवळ असलेल्या भटकी शाळेच्या गेटसमोर एका अर्भकाचा मृतदेह आढळून आल्याने एकच खळबळ उडाली. अज्ञात व्यक्तींनी हे अर्भक तेथे ठेवून पसार झाल्याचा प्राथमिक अंदाज व्यक्त होत आहे. दुर्दैवाने मृतदेहावरून वाहन गेल्याने अर्भकाचा जागीच चेंदा-मेंदा झाला.

शनिवारी दुपारी अंदाजे ३ ते ३.३० वाजण्याच्या दरम्यान हा प्रकार उघडकीस आला. परिसरातील नागरिकांनी अर्भकाचा मृतदेह पाहताच संताप आणि दुःख व्यक्त केले. त्यांनी तातडीने पोलिसांना माहिती दिली. घटनेची माहिती मिळताच बिटमलदार श्रीनिवास आरदवाड व पोलीस अमलदार कोळेकर यांनी घटनास्थळी धाव घेऊन मृतदेह ताब्यात घेतला व तो उपजिल्हा रुग्णालय, तुळजापूर येथे पाठविण्यात आला.

या अमानवी कृत्यामुळे संपूर्ण शहरात संतापाची लाट उसळली आहे. पुण्यभूमी तुळजापूरात अशी लाजिरवाणी घटना घडणे ही शोकांतिका असल्याचे नागरिकांनी व्यक्त केले. दोषींना कठोर शिक्षा व्हावी, अशी जोरदार मागणी स्थानिकांकडून होत आहे.

सध्या तुळजापूर शहर व परिसरात पावसाचे प्रमाण वाढले असून पावसामुळे महत्त्वाचे पुरावे वाहून जाण्याची शक्यता आहे. त्यामुळे पोलीस प्रशासनाने तपास जलदगतीने सुरू केला आहे. अर्भक कुठून आणले गेले आणि या घटनेमागचे खरे कारण काय, याचा शोध घेण्यासाठी चौकशी सुरू आहे.

या हृदयद्रावक घटनेमुळे नागरिकांमध्ये अस्वस्थता व संताप आहे. दोषींना गजाआड करून कठोरात कठोर शिक्षा व्हावी, अशी अपेक्षा सर्व स्तरांतून व्यक्त केली जात आहे. तसेच भविष्यात अशा अमानवी घटनांची पुनरावृत्ती होऊ नये, यासाठी प्रशासनाने प्रभावी उपाययोजना कराव्यात, अशी मागणी होत आहे.

ही घटना केवळ तुळजापूरच नव्हे तर संपूर्ण समाजमनाला चटका लावणारी ठरली असून, लहानग्या अर्भकाच्या मृत्यूमागचे सत्य काय, हे समोर येण्यासाठी सर्वांची नजर पोलीस तपासावर खिळली आहे.