शारदीय नवरात्र महोत्सवात श्री तुळजाभवानी मंदिर प्रशासनाकडून पास दरवाढ;भक्तांत नाराजी

 

प्रतिनिधी : जुबेर शेख 

तुळजापूर : श्री तुळजाभवानी मंदिर संस्था, तुळजापूर येथे दरवर्षीप्रमाणे याही वर्षी शारदीय नवरात्र महोत्सव २०२५ (शके १९४७) मोठ्या उत्साहात साजरा होणार आहे. यासाठी मंदिर प्रशासनाने दुपटीने वाढीव दर जाहीर केल्याने भाविकांमध्ये नाराजी व्यक्त होत आहे.

मंदिर संस्थेच्या प्रसिद्धीपत्रकानुसार, दर्शन पासांचे दर या वर्षी मोठ्या प्रमाणात वाढविण्यात आले आहेत. २० सप्टेंबर २०२५ ते ६ ऑक्टोबर २०२५ या कालावधीत दर्शन पासांसाठी खालीलप्रमाणे शुल्क आकारले जाणार आहे.

दुप्पट दराने २०० रुपयांचा देनगी दर्शन पास आता ३०० रुपयांना मिळणार आहे.

५०० रुपयांचा देनगी दर्शन पास १००० रुपयांपर्यंत वाढविण्यात आला आहे.

स्पेशल गेस्ट दर्शन पास (रिफरल पास) २०० ऐवजी ५०० रुपये करावा लागणार आहे.

सकाळच्या अभिषेक पासांची संख्या देखील ३०० वरून ४०० करण्यात आली आहे.

या दरवाढीमुळे गरीब व साध्या भाविकांना नवरात्र महोत्सव काळात दर्शन घेणे अवघड होणार असल्याची भावना व्यक्त होत आहे. भाविकांच्या गर्दीचे नियोजन व व्यवस्थापन करण्यासाठी प्रशासनाने हा निर्णय घेतल्याचे सांगितले जात असले तरी भक्तांच्या खिशाला मोठा फटका बसणार आहे.

तसेच, दिनांक १४ सप्टेंबर २०२५ पासून पुढील अभिषेक पास बुकिंग सुरू होणार आहे. पहिला टप्पा १५ सप्टेंबर रोजी सायं. ८ वाजल्यापासून सुरू होईल. तर १६ सप्टेंबरपासून १८ ऑक्टोबरपर्यंतचे अभिषेक पास हे १५ सप्टेंबर रोजी संध्याकाळी ४ वाजेपर्यंत बुक करता येतील, असे प्रशासनाने कळविले आहे.

नवरात्र महोत्सव काळात दर्शन पासांवर दुप्पट शुल्क आकारल्यामुळे भाविकांमध्ये प्रशासनाविरोधात तीव्र नाराजी असून, मंदिर संस्था यावर पुनर्विचार करणार का? याकडे सर्वांचे लक्ष लागले आहे.