श्री मुद्गुलेश्वर महादेव सेवा समिती आणि युवा प्रतिष्ठान तुळजापूरतर्फे महाशिवरात्रीला भव्य महाप्रसादाचे आयोजन

प्रतिनिधी : जुबेर शेख 

तुळजापूर – श्री मुद्गुलेश्वर महादेव सेवा समिती व मुद्गुलेश्वर युवा प्रतिष्ठान तुळजापूर यांच्या संयुक्त विद्यमाने श्री मुद्गुलेश्वर महादेव मंदिरात महाशिवरात्रीच्या निमित्ताने भव्य महाप्रसादाचे आयोजन करण्यात आले. या प्रसादात 1008 किलो साबुदाणा खिचडी, 11,000 खरबूज, 11,000 राजगिरा लाडू तसेच दूध खीर यांचा समावेश होता. याशिवाय, भक्तांसाठी पिण्याच्या पाण्याचीही विशेष व्यवस्था करण्यात आली होती.

या दिवशी मंदिरात भाविकांची मोठी गर्दी होती. हजारो शिवभक्तांनी महाप्रसादाचा लाभ घेतला व महादेवाचे दर्शन घेऊन आपल्या श्रद्धेची पुन्हा प्रचिती दिली. या कार्यक्रमासाठी सेवा समितीच्या वतीने विशेष व्यवस्था करण्यात आली होती. स्वयंसेवकांनीही भक्तांना सुविधा मिळावी म्हणून महत्वपूर्ण भूमिका बजावली.

महाशिवरात्री निमित्त मंदिरात विविध धार्मिक कार्यक्रम, भजन, कीर्तन आणि महाआरतीचे आयोजन करण्यात आले होते. भाविकांनी हरहर महादेवच्या गजरात महादेवाच्या चरणी नतमस्तक होत आनंद अनुभवला.

श्री मुद्गुलेश्वर महादेव सेवा समिती व युवा प्रतिष्ठान तुळजापूरच्या वतीने सातत्याने सामाजिक व धार्मिक कार्य केले जाते. यंदाही महाशिवरात्री निमित्त भाविकांसाठी भव्य महाप्रसादाचे आयोजन करून त्यांनी सेवा भाव जपला. या उपक्रमासाठी समितीच्या पदाधिकाऱ्यांसह अनेक भक्तांनी मेहनत घेतली.

भाविकांकडून उत्स्फूर्त प्रतिसाद

महाप्रसादाचा लाभ घेतलेल्या अनेक भाविकांनी समितीच्या कार्याचे कौतुक केले. या निमित्ताने समाजातील सर्व स्तरांतील लोक एकत्र आले व भक्तीमय वातावरणात महाशिवरात्री साजरी केली.

श्री मुद्गुलेश्वर महादेव सेवा समिती आणि युवा प्रतिष्ठानच्या या उपक्रमामुळे भाविकांना एकात्मतेचा संदेश मिळाला असून, पुढील वर्षीही अशीच व्यवस्था राहावी, अशी इच्छा भक्तांनी व्यक्त केली.