धाराशिव जिल्ह्यात अन्न व औषध प्रशासनाची मोठी कारवाई;तब्बल १ कोटी २ लाखांहून अधिक किमतीचा प्रतिबंधित गुटखा व तंबाखूजन्य साठा जप्त

 

प्रतिनिधी : जुबेर शेख 

धाराशिव : धाराशिव जिल्ह्यातील परंडा शहरात अन्न व औषध प्रशासन विभागाने मोठी धडक कारवाई करत प्रतिबंधित गुटखा, पानमसाला व तंबाखूजन्य पदार्थांचा कोट्यवधी रुपयांचा साठा जप्त केला आहे. या कारवाईमुळे परंडा शहरासह जिल्ह्यात खळबळ उडाली असून प्रतिबंधित अन्नपदार्थांच्या अवैध साठवणूक व विक्री करणाऱ्यांमध्ये भीतीचे वातावरण निर्माण झाले आहे.

अन्न व औषध प्रशासन, धाराशिव यांना प्राप्त झालेल्या गोपनीय माहितीनुसार दि. ५ जून २०२६ रोजी परंडा शहरातील हैदरअली रोड परिसरातील दाऊद फकिर पठाण यांच्या राहत्या घरावर छापा टाकण्यात आला. अन्न सुरक्षा अधिकारी रो. दि. फंदी यांनी केलेल्या तपासणीत केआर-१००० गुटखा, के गुटखा, डायरेक्टर पानमसाला, व्ही-०६ रॉयल जाफरानी जर्दा तसेच एम सुगंधित तंबाखू यांसारख्या विविध प्रतिबंधित पदार्थांचा साठा आढळून आला. या ठिकाणाहून एकूण ७८ हजार ७५५ रुपये किमतीचा माल जप्त करण्यात आला.

याच कारवाईदरम्यान प्रशासनाने परंडा येथील वावची चौकाजवळ असलेल्या समाधान खुळे व प्रदीप खुळे यांच्या मालकीच्या तीन गोडाऊनची तपासणी केली. या तपासणीत डायरेक्टर पानमसाला, राजनिवास पानमसाला, केएन-०१ जाफरानी जर्दा, हिरा पानमसाला, रॉयल ७१७ सुगंधित तंबाखू, बादशहा, दिल्लगी सुपारी, व्ही-१ तंबाखू, तुलसी जाफरानी जर्दा, विमल पानमसाला, रजनीगंधा पानमसाला, आरएमडी पानमसाला, केआर-१००० गुटखा यांसह अनेक प्रतिबंधित उत्पादनांचा प्रचंड साठा आढळून आला.

या गोडाऊनमधून तब्बल १ कोटी १ लाख ८८ हजार ५०८ रुपये किमतीचा प्रतिबंधित माल जप्त करण्यात आला. जप्त केलेला संपूर्ण साठा पोलीस स्टेशन, परंडा येथे सुरक्षित ठेवण्यात आला असून प्रत्येक उत्पादनाचे नमुने विश्लेषणासाठी घेण्यात आले आहेत.

या प्रकरणात दाऊद फकिर पठाण यांच्याविरुद्ध भारतीय दंड संहितेच्या कलम १८८, २७२, २७३ आणि ३२८ अन्वये परंडा पोलीस ठाण्यात गुन्हा दाखल करण्यात आला आहे. तसेच गोडाऊन मालक समाधान खुळे व प्रदीप खुळे यांच्याविरुद्धही संबंधित कायद्यानुसार फिर्याद दाखल करण्यात आली आहे.

विशेष म्हणजे, अन्न व औषध प्रशासनाचे आयुक्त यांच्या आदेशानुसार संबंधित तीनही गोडाऊन सील करण्यात आले असून पुढील तपास सुरू आहे.

ही कारवाई अन्न सुरक्षा अधिकारी रो. दि. फंदी, ग. शं. दत्तू (धाराशिव), एस. एस. सावंत (पुणे), धनंजय आघाव, सुमित खांडेकर, अभिजित झिंगर (सांगली), सी. आर. स्वामी व उमेश भुसे (सोलापूर) यांच्या पथकाने संयुक्तरीत्या केली. ही मोहीम अन्न व औषध प्रशासनाचे आयुक्त तुकाराम मुंढे यांच्या आदेशानुसार तसेच सह आयुक्त (अन्न) रा. करकळे आणि सहायक आयुक्त (अन्न) प्र. शा. काकडे यांच्या मार्गदर्शनाखाली पार पडली.

अन्न व औषध प्रशासनाच्या या कारवाईमुळे परंडा परिसरातील प्रतिबंधित गुटखा आणि तंबाखूजन्य पदार्थांच्या अवैध व्यापारावर मोठा आघात बसल्याचे मानले जात आहे. प्रशासनाकडून अशा प्रकारच्या कारवाया पुढेही सुरू राहणार असल्याचे संकेत मिळत आहेत.