प्रतिनिधी : जुबेर शेख
मुंबई : राज्य प्रशासनात पुन्हा एकदा मोठा बदल पाहायला मिळाला असून कडक आणि कार्यक्षम अधिकारी म्हणून ओळख असलेले आयएएस अधिकारी तुकाराम मुंढे यांची दिव्यांग कल्याण विभागातून बदली करण्यात आली आहे. नव्या आदेशानुसार, ते आता आपत्ती व्यवस्थापन, महसूल आणि वनविभागाचे सचिव म्हणून महत्त्वाची जबाबदारी सांभाळणार आहेत.
तुकाराम मुंढे हे त्यांच्या कठोर निर्णयक्षमतेमुळे आणि पारदर्शक प्रशासनशैलीमुळे नेहमीच चर्चेत राहिले आहेत. त्यांनी ज्या-ज्या विभागात काम केले, तेथे शिस्त आणि कार्यक्षमता वाढवण्यावर भर दिला. मात्र, त्यांच्या कारकिर्दीत वारंवार होणाऱ्या बदल्यांमुळेही ते तितकेच चर्चेत राहिले आहेत.
मुंढे यांच्या सेवाकाळातील एक विशेष बाब म्हणजे गेल्या सुमारे २१ वर्षांत त्यांची तब्बल २५ वेळा बदली झाली आहे. इतक्या मोठ्या प्रमाणात बदल्या होणारे ते राज्यातील मोजकेच अधिकारी मानले जातात. त्यांच्या कठोर कारभारामुळे अनेकदा राजकीय वाद निर्माण झाले, ज्याचा परिणाम त्यांच्या वारंवार बदल्यांमध्ये दिसून येतो, अशी चर्चा प्रशासन वर्तुळात होत असते.
आपत्ती व्यवस्थापन, महसूल आणि वनविभाग हे राज्यासाठी अत्यंत संवेदनशील आणि महत्त्वाचे विभाग मानले जातात. नैसर्गिक आपत्ती, पूर, दुष्काळ यांसारख्या परिस्थितीत प्रभावी समन्वय राखणे ही या विभागाची मोठी जबाबदारी असते. अशा परिस्थितीत मुंढे यांची नियुक्ती महत्त्वपूर्ण मानली जात आहे.
नव्या पदावर रुजू झाल्यानंतर तुकाराम मुंढे हे कोणते निर्णय घेतात, प्रशासनात कोणते बदल घडवतात आणि त्यांच्या कामाची दिशा काय असेल याकडे राज्यभरातील प्रशासन आणि नागरिकांचे लक्ष लागले आहे.
मुंढे यांच्या वारंवार बदल्यांवरून प्रशासनातील स्थिरतेचा प्रश्न पुन्हा एकदा ऐरणीवर आला असून, कार्यक्षम अधिकाऱ्यांना दीर्घकाळ एकाच ठिकाणी काम करण्याची संधी मिळावी, अशीही मागणी काही स्तरांतून होत आहे.
0 टिप्पण्या